5. பாடிதே³ஸனீயகண்ட³ங் (பி⁴க்கு²னீவிப⁴ங்கோ³)

1. பட²மபாடிதே³ஸனீயஸிக்கா²பத³ங்

இமே கோ² பனாய்யாயோ அட்ட² பாடிதே³ஸனீயா

த⁴ம்மா உத்³தே³ஸங் ஆக³ச்ச²ந்தி.

1228. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ ஸப்பிங் விஞ்ஞாபெத்வா பு⁴ஞ்ஜந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ ஸப்பிங் விஞ்ஞாபெத்வா பு⁴ஞ்ஜிஸ்ஸந்தி! கஸ்ஸ ஸம்பன்னங் ந மனாபங், கஸ்ஸ ஸாது³ங் ந ருச்சதீ’’தி! அஸ்ஸோஸுங் கோ² பி⁴க்கு²னியோ தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ ஸப்பிங் விஞ்ஞாபெத்வா பு⁴ஞ்ஜிஸ்ஸந்தீ’’தி…பே॰… ஸச்சங் கிர, பி⁴க்க²வே, ச²ப்³ப³க்³கி³யா, பி⁴க்கு²னியோ ஸப்பிங் விஞ்ஞாபெத்வா பு⁴ஞ்ஜந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ ஸப்பிங் விஞ்ஞாபெத்வா பு⁴ஞ்ஜிஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –

‘‘யா பன பி⁴க்கு²னீ ஸப்பிங் விஞ்ஞாபெத்வா பு⁴ஞ்ஜெய்ய, படிதே³ஸேதப்³ப³ங் தாய பி⁴க்கு²னியா – ‘கா³ரய்ஹங், அய்யே, த⁴ம்மங் ஆபஜ்ஜிங் அஸப்பாயங் பாடிதே³ஸனீயங், தங் படிதே³ஸேமீ’’’தி.

ஏவஞ்சித³ங் ப⁴க³வதா பி⁴க்கு²னீனங் ஸிக்கா²பத³ங் பஞ்ஞத்தங் ஹோதி.

1229. தேன கோ² பன ஸமயேன பி⁴க்கு²னியோ கி³லானா ஹொந்தி. கி³லானபுச்சி²கா பி⁴க்கு²னியோ கி³லானா பி⁴க்கு²னியோ ஏதத³வோசுங் – ‘‘கச்சி, அய்யே, க²மனீயங், கச்சி யாபனீய’’ந்தி? ‘‘புப்³பே³ மயங், அய்யே, ஸப்பிங் விஞ்ஞாபெத்வா பு⁴ஞ்ஜாம, தேன நோ பா²ஸு ஹோதி; இதா³னி பன ‘‘ப⁴க³வதா படிக்கி²த்த’’ந்தி குக்குச்சாயந்தா ந விஞ்ஞாபேம, தேன நோ ந பா²ஸு ஹோதீ’’தி…பே॰… ப⁴க³வதோ ஏதமத்த²ங் ஆரோசேஸுங்…பே॰… அனுஜானாமி, பி⁴க்க²வே, கி³லானாய பி⁴க்கு²னியா ஸப்பிங் விஞ்ஞாபெத்வா பு⁴ஞ்ஜிதுங் . ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –

1230. ‘‘யா பன பி⁴க்கு²னீ அகி³லானா ஸப்பிங் விஞ்ஞாபெத்வா பு⁴ஞ்ஜெய்ய, படிதே³ஸேதப்³ப³ங் தாய பி⁴க்கு²னியா – ‘கா³ரய்ஹங், அய்யே, த⁴ம்மங் ஆபஜ்ஜிங் அஸப்பாயங் பாடிதே³ஸனீயங் தங் படிதே³ஸேமீ’’’தி.

1231. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.

அகி³லானா நாம யஸ்ஸா வினா ஸப்பினா பா²ஸு ஹோதி.

கி³லானா நாம யஸ்ஸா வினா ஸப்பினா ந பா²ஸு ஹோதி.

ஸப்பி நாம கோ³ஸப்பி வா அஜிகாஸப்பி வா மஹிங்ஸஸப்பி வா. யேஸங் மங்ஸங் கப்பதி தேஸங் ஸப்பி.

அகி³லானா அத்தனோ அத்தா²ய விஞ்ஞாபேதி, பயோகே³ து³க்கடங். படிலாபே⁴ன ‘‘பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி பாடிதே³ஸனீயஸ்ஸ.

1232. அகி³லானா அகி³லானஸஞ்ஞா ஸப்பிங் விஞ்ஞாபெத்வா பு⁴ஞ்ஜதி, ஆபத்தி பாடிதே³ஸனீயஸ்ஸ. அகி³லானா வேமதிகா ஸப்பிங் விஞ்ஞாபெத்வா பு⁴ஞ்ஜதி, ஆபத்தி பாடிதே³ஸனீயஸ்ஸ. அகி³லானா கி³லானஸஞ்ஞா ஸப்பிங் விஞ்ஞாபெத்வா பு⁴ஞ்ஜதி, ஆபத்தி பாடிதே³ஸனீயஸ்ஸ.

கி³லானா அகி³லானஸஞ்ஞா, ஆபத்தி து³க்கடஸ்ஸ. கி³லானா வேமதிகா, ஆபத்தி து³க்கடஸ்ஸ. கி³லானா கி³லானஸஞ்ஞா, அனாபத்தி.

1233. அனாபத்தி கி³லானாய, கி³லானா ஹுத்வா விஞ்ஞாபெத்வா அகி³லானா பு⁴ஞ்ஜதி, கி³லானாய ஸேஸகங் பு⁴ஞ்ஜதி, ஞாதகானங் பவாரிதானங், அஞ்ஞஸ்ஸத்தா²ய, அத்தனோ த⁴னேன, உம்மத்திகாய, ஆதி³கம்மிகாயாதி.

பட²மபாடிதே³ஸனீயஸிக்கா²பத³ங் நிட்டி²தங்.

2. து³தியாதி³பாடிதே³ஸனீயஸிக்கா²பதா³னி

1234. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ தேலங் விஞ்ஞாபெத்வா பு⁴ஞ்ஜந்தி…பே॰… மது⁴ங் விஞ்ஞாபெத்வா பு⁴ஞ்ஜந்தி…பே॰… பா²ணிதங் விஞ்ஞாபெத்வா பு⁴ஞ்ஜந்தி…பே॰… மச்ச²ங் விஞ்ஞாபெத்வா பு⁴ஞ்ஜந்தி…பே॰… மங்ஸங் விஞ்ஞாபெத்வா பு⁴ஞ்ஜந்தி…பே॰… கீ²ரங் விஞ்ஞாபெத்வா பு⁴ஞ்ஜந்தி…பே॰… த³தி⁴ங் விஞ்ஞாபெத்வா பு⁴ஞ்ஜந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ த³தி⁴ங் விஞ்ஞாபெத்வா பு⁴ஞ்ஜிஸ்ஸந்தி! கஸ்ஸ ஸம்பன்னங் ந மனாபங், கஸ்ஸ ஸாது³ங் ந ருச்சதீ’’தி! அஸ்ஸோஸுங் கோ² பி⁴க்கு²னியோ தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ த³தி⁴ங் விஞ்ஞாபெத்வா பு⁴ஞ்ஜிஸ்ஸந்தீ’’தி…பே॰… ஸச்சங் கிர, பி⁴க்க²வே, ச²ப்³ப³க்³கி³யா பி⁴க்கு²னியோ த³தி⁴ங் விஞ்ஞாபெத்வா பு⁴ஞ்ஜந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ த³தி⁴ங் விஞ்ஞாபெத்வா பு⁴ஞ்ஜிஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –

‘‘யா பன பி⁴க்கு²னீ த³தி⁴ங் விஞ்ஞாபெத்வா பு⁴ஞ்ஜெய்ய, படிதே³ஸேதப்³ப³ங் தாய பி⁴க்கு²னியா – ‘கா³ரய்ஹங், அய்யே, த⁴ம்மங் ஆபஜ்ஜிங் அஸப்பாயங் பாடிதே³ஸனீயங், தங் படிதே³ஸேமீ’’’தி.

ஏவஞ்சித³ங் ப⁴க³வதா பி⁴க்கு²னீனங் ஸிக்கா²பத³ங் பஞ்ஞத்தங் ஹோதி.

1235. தேன கோ² பன ஸமயேன பி⁴க்கு²னியோ கி³லானா ஹொந்தி. கி³லானபுச்சி²கா பி⁴க்கு²னியோ கி³லானா பி⁴க்கு²னியோ ஏதத³வோசுங் – ‘‘கச்சி, அய்யே, க²மனீயங், கச்சி யாபனீய’’ந்தி? ‘‘புப்³பே³ மயங், அய்யே, த³தி⁴ங் விஞ்ஞாபெத்வா பு⁴ஞ்ஜிம்ஹா, தேன நோ பா²ஸு ஹோதி, இதா³னி பன ‘‘ப⁴க³வதா படிக்கி²த்த’’ந்தி குக்குச்சாயந்தா ந விஞ்ஞாபேம, தேன நோ ந பா²ஸு ஹோதீ’’தி…பே॰… ப⁴க³வதோ ஏதமத்த²ங் ஆரோசேஸுங்…பே॰… அனுஜானாமி, பி⁴க்க²வே, கி³லானாய பி⁴க்கு²னியா த³தி⁴ங் விஞ்ஞாபெத்வா பு⁴ஞ்ஜிதுங். ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –

1236. ‘‘யா பன பி⁴க்கு²னீ அகி³லானா (தேலங்…பே॰… மது⁴ங்…பே॰… பா²ணிதங்…பே॰… மச்ச²ங்…பே॰… மங்ஸங்…பே॰… கீ²ரங்…பே॰…) த³தி⁴ங் விஞ்ஞாபெத்வா பு⁴ஞ்ஜெய்ய , படிதே³ஸேதப்³ப³ங் தாய பி⁴க்கு²னியா – ‘கா³ரய்ஹங், அய்யே, த⁴ம்மங் ஆபஜ்ஜிங் அஸப்பாயங் பாடிதே³ஸனீயங், தங் படிதே³ஸேமீ’’’தி.

1237. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.

அகி³லானா நாம யஸ்ஸா வினா த³தி⁴னா பா²ஸு ஹோதி.

கி³லானா நாம யஸ்ஸா வினா த³தி⁴னா ந பா²ஸு ஹோதி.

தேலங் நாம திலதேலங் ஸாஸபதேலங் மது⁴கதேலங் ஏரண்ட³தேலங் வஸாதேலங்.

மது⁴ நாம மக்கி²காமது⁴. பா²ணிதங் நாம உச்சு²ம்ஹா நிப்³ப³த்தங். மச்சோ² நாம ஓத³கோ வுச்சதி. மங்ஸங் நாம யேஸங் மங்ஸங் கப்பதி தேஸங் மங்ஸங். கீ²ரங் நாம கோ³கீ²ரங் வா அஜிகாகீ²ரங் வா மஹிங்ஸகீ²ரங் வா யேஸங் மங்ஸங் கப்பதி தேஸங் கீ²ரங். த³தி⁴ நாம தேஸஞ்ஞேவ த³தி⁴.

அகி³லானா அத்தனோ அத்தா²ய விஞ்ஞாபேதி, பயோகே³ து³க்கடங். படிலாபே⁴ன பு⁴ஞ்ஜிஸ்ஸாமீதி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி பாடிதே³ஸனீயஸ்ஸ.

1238. அகி³லானா அகி³லானஸஞ்ஞா த³தி⁴ங் விஞ்ஞாபெத்வா பு⁴ஞ்ஜதி, ஆபத்தி பாடிதே³ஸனீயஸ்ஸ . அகி³லானா வேமதிகா த³தி⁴ங் விஞ்ஞாபெத்வா பு⁴ஞ்ஜதி, ஆபத்தி பாடிதே³ஸனீயஸ்ஸ. அகி³லானா கி³லானஸஞ்ஞா த³தி⁴ங் விஞ்ஞாபெத்வா பு⁴ஞ்ஜதி, ஆபத்தி பாடிதே³ஸனீயஸ்ஸ.

கி³லானா அகி³லானஸஞ்ஞா, ஆபத்தி து³க்கடஸ்ஸ. கி³லானா வேமதிகா, ஆபத்தி து³க்கடஸ்ஸ. கி³லானா கி³லானஸஞ்ஞா அனாபத்தி.

1239. அனாபத்தி கி³லானாய, கி³லானா ஹுத்வா விஞ்ஞாபெத்வா அகி³லானா பு⁴ஞ்ஜதி, கி³லானாய ஸேஸகங் பு⁴ஞ்ஜதி, ஞாதகானங் பவாரிதானங், அஞ்ஞஸ்ஸத்தா²ய, அத்தனோ த⁴னேன, உம்மத்திகாய, ஆதி³கம்மிகாயாதி.

அட்ட²மபாடிதே³ஸனீயஸிக்கா²பத³ங் நிட்டி²தங்.

உத்³தி³ட்டா² கோ², அய்யாயோ, அட்ட² பாடிதே³ஸனீயா த⁴ம்மா. தத்தா²ய்யாயோ புச்சா²மி – ‘‘கச்சித்த² பரிஸுத்³தா⁴’’? து³தியம்பி புச்சா²மி – ‘‘கச்சித்த² பரிஸுத்³தா⁴’’? ததியம்பி புச்சா²மி – ‘‘கச்சித்த² பரிஸுத்³தா⁴’’? பரிஸுத்³தெ⁴த்தா²ய்யாயோ, தஸ்மா துண்ஹீ, ஏவமேதங் தா⁴ரயாமீதி.

பி⁴க்கு²னிவிப⁴ங்கே³ பாடிதே³ஸனீயகண்ட³ங் நிட்டி²தங்.