3. அனியதகண்ட³ங்

1. பட²மஅனியதஸிக்கா²பத³ங்

இமே கோ² பனாயஸ்மந்தோ த்³வே அனியதா த⁴ம்மா

உத்³தே³ஸங் ஆக³ச்ச²ந்தி.

443. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உதா³யீ ஸாவத்தி²யங் குலூபகோ ஹோதி, ப³ஹுகானி குலானி உபஸங்கமதி. தேன கோ² பன ஸமயேன ஆயஸ்மதோ உதா³யிஸ்ஸ உபட்டா²ககுலஸ்ஸ குமாரிகா அஞ்ஞதரஸ்ஸ குலஸ்ஸ குமாரகஸ்ஸ தி³ன்னா ஹோதி. அத² கோ² ஆயஸ்மா உதா³யீ புப்³ப³ண்ஹஸமயங் நிவாஸெத்வா பத்தசீவரமாதா³ய யேன தங் குலங் தேனுபஸங்கமி; உபஸங்கமித்வா மனுஸ்ஸே புச்சி² – ‘‘கஹங் இத்த²ன்னாமா’’தி? தே ஏவமாஹங்ஸு – ‘‘தி³ன்னா, ப⁴ந்தே, அமுகஸ்ஸ குலஸ்ஸ குமாரகஸ்ஸா’’தி. தம்பி கோ² குலங் ஆயஸ்மதோ உதா³யிஸ்ஸ உபட்டா²கங் ஹோதி. அத² கோ² ஆயஸ்மா உதா³யீ யேன தங் குலங் தேனுபஸங்கமி; உபஸங்கமித்வா மனுஸ்ஸே புச்சி² – ‘‘கஹங் இத்த²ன்னாமா’’தி? தே ஏவமாஹங்ஸு – ‘‘ஏஸாய்ய, ஓவரகே நிஸின்னா’’தி. அத² கோ² ஆயஸ்மா உதா³யீ யேன ஸா குமாரிகா தேனுபஸங்கமி; உபஸங்கமித்வா தஸ்ஸா குமாரிகாய ஸத்³தி⁴ங் ஏகோ ஏகாய ரஹோ படிச்ச²ன்னே ஆஸனே அலங்கம்மனியே நிஸஜ்ஜங் கப்பேஸி காலயுத்தங் ஸமுல்லபந்தோ காலயுத்தங் த⁴ம்மங் ப⁴ணந்தோ.

தேன கோ² பன ஸமயேன விஸாகா² மிகா³ரமாதா ப³ஹுபுத்தா ஹோதி ப³ஹுனத்தா அரோக³புத்தா அரோக³னத்தா அபி⁴மங்க³லஸம்மதா. மனுஸ்ஸா யஞ்ஞேஸு ச²ணேஸு உஸ்ஸவேஸு விஸாக²ங் மிகா³ரமாதரங் பட²மங் போ⁴ஜெந்தி. அத² கோ² விஸாகா² மிகா³ரமாதா நிமந்திதா தங் குலங் அக³மாஸி. அத்³த³ஸா கோ² விஸாகா² மிகா³ரமாதா ஆயஸ்மந்தங் உதா³யிங் தஸ்ஸா குமாரிகாய ஸத்³தி⁴ங் ஏகங் ஏகாய ரஹோ படிச்ச²ன்னே ஆஸனே அலங்கம்மனியே நிஸின்னங். தி³ஸ்வான ஆயஸ்மந்தங் உதா³யிங் ஏதத³வோச – ‘‘இத³ங், ப⁴ந்தே, நச்ச²ன்னங் நப்பதிரூபங் யங் அய்யோ மாதுகா³மேன ஸத்³தி⁴ங் ஏகோ ஏகாய ரஹோ படிச்ச²ன்னே ஆஸனே அலங்கம்மனியே நிஸஜ்ஜங் கப்பேதி. கிஞ்சாபி, ப⁴ந்தே, அய்யோ அனத்தி²கோ தேன த⁴ம்மேன, அபிச து³ஸ்ஸத்³தா⁴பயா அப்பஸன்னா மனுஸ்ஸா’’தி. ஏவம்பி கோ² ஆயஸ்மா உதா³யீ விஸாகா²ய மிகா³ரமாதுயா வுச்சமானோ நாதி³யி. அத² கோ² விஸாகா² மிகா³ரமாதா நிக்க²மித்வா பி⁴க்கூ²னங் ஏதமத்த²ங் ஆரோசேஸி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆயஸ்மா உதா³யீ மாதுகா³மேன ஸத்³தி⁴ங் ஏகோ ஏகாய ரஹோ படிச்ச²ன்னே ஆஸனே அலங்கம்மனியே நிஸஜ்ஜங் கப்பெஸ்ஸதீ’’தி! அத² கோ² தே பி⁴க்கூ² ஆயஸ்மந்தங் உதா³யிங் அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங்…பே॰… ‘‘ஸச்சங் கிர த்வங், உதா³யி, மாதுகா³மேன ஸத்³தி⁴ங் ஏகோ ஏகாய ரஹோ படிச்ச²ன்னே ஆஸனே அலங்கம்மனியே நிஸஜ்ஜங் கப்பேஸீ’’தி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம த்வங், மோக⁴புரிஸ, மாதுகா³மேன ஸத்³தி⁴ங் ஏகோ ஏகாய ரஹோ படிச்ச²ன்னே ஆஸனே அலங்கம்மனியே நிஸஜ்ஜங் கப்பெஸ்ஸஸி! நேதங், மோக⁴புரிஸ, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே , இமங் ஸிக்கா²பத³ங் உத்³தி³ஸெய்யாத² –

444. ‘‘யோ பன பி⁴க்கு² மாதுகா³மேன ஸத்³தி⁴ங் ஏகோ ஏகாய ரஹோ படிச்ச²ன்னே ஆஸனே அலங்கம்மனியே நிஸஜ்ஜங் கப்பெய்ய, தமேனங் ஸத்³தெ⁴ய்யவசஸா உபாஸிகா தி³ஸ்வா திண்ணங் த⁴ம்மானங் அஞ்ஞதரேன வதெ³ய்ய – பாராஜிகேன வா ஸங்கா⁴தி³ஸேஸேன வா பாசித்தியேன வா, நிஸஜ்ஜங் பி⁴க்கு² படிஜானமானோ திண்ணங் த⁴ம்மானங் அஞ்ஞதரேன காரேதப்³போ³ – பாராஜிகேன வா ஸங்கா⁴தி³ஸேஸேன வா பாசித்தியேன வா யேன வா ஸா ஸத்³தெ⁴ய்யவசஸா உபாஸிகா வதெ³ய்ய, தேன ஸோ பி⁴க்கு² காரேதப்³போ³. அயங் த⁴ம்மோ அனியதோ’’தி.

445. யோ பனாதி யோ யாதி³ஸோ…பே॰… பி⁴க்கூ²தி…பே॰… அயங் இமஸ்மிங் அத்தே² அதி⁴ப்பேதோ பி⁴க்கூ²தி.

மாதுகா³மோ நாம மனுஸ்ஸித்தீ², ந யக்கீ² ந பேதீ ந திரச்சா²னக³தா. அந்தமஸோ தத³ஹுஜாதாபி தா³ரிகா, பகே³வ மஹத்தரீ.

ஸத்³தி⁴ந்தி ஏகதோ.

ஏகோ ஏகாயாதி பி⁴க்கு² சேவ ஹோதி மாதுகா³மோ ச.

ரஹோ நாம சக்கு²ஸ்ஸ ரஹோ, ஸோதஸ்ஸ ரஹோ. சக்கு²ஸ்ஸ ரஹோநாம ந ஸக்கா ஹோதி அக்கி²ங் வா நிக²ணீயமானே ப⁴முகங் வா உக்கி²பீயமானே ஸீஸங் வா உக்கி²பீயமானே பஸ்ஸிதுங். ஸோதஸ்ஸ ரஹோநாம ந ஸக்கா ஹோதி பகதிகதா² ஸோதுங்.

படிச்ச²ன்னங் நாம ஆஸனங் குட்டேன வா குட்³டே³ன வா (ஸீ॰ ஸ்யா॰) கவாடேன வா கிலஞ்ஜேன வா ஸாணிபாகாரேன வா ருக்கே²ன வா த²ம்பே⁴ன வா கொத்த²ளியா வா யேன கேனசி படிச்ச²ன்னங் ஹோதி.

அலங்கம்மனியேதி ஸக்கா ஹோதி மேது²னங் த⁴ம்மங் படிஸேவிதுங்.

நிஸஜ்ஜங் கப்பெய்யாதி மாதுகா³மே நிஸின்னே பி⁴க்கு² உபனிஸின்னோ வா ஹோதி உபனிபன்னோ வா. பி⁴க்கு² நிஸின்னே மாதுகா³மோ உபனிஸின்னோ வா ஹோதி உபனிபன்னோ வா. உபோ⁴ வா நிஸின்னா ஹொந்தி உபோ⁴ வா நிபன்னா.

ஸத்³தெ⁴ய்யவசஸா நாம ஆக³தப²லா அபி⁴ஸமேதாவினீ விஞ்ஞாதஸாஸனா.

உபாஸிகா நாம பு³த்³த⁴ங் ஸரணங் க³தா, த⁴ம்மங் ஸரணங் க³தா, ஸங்க⁴ங் ஸரணங் க³தா.

தி³ஸ்வாதி பஸ்ஸித்வா.

திண்ணங் த⁴ம்மானங் அஞ்ஞதரேன வதெ³ய்ய – பாராஜிகேன வா ஸங்கா⁴தி³ஸேஸேன வா பாசித்தியேன வா. நிஸஜ்ஜங் பி⁴க்கு² படிஜானமானோ திண்ணங் த⁴ம்மானங் அஞ்ஞதரேன காரேதப்³போ³ – பாராஜிகேன வா ஸங்கா⁴தி³ஸேஸேன வா பாசித்தியேன வா. யேன வா ஸா ஸத்³தெ⁴ய்யவசஸா உபாஸிகா வதெ³ய்ய தேன ஸோ பி⁴க்கு² காரேதப்³போ³.

446. ஸா சே ஏவங் வதெ³ய்ய – ‘‘அய்யோ மயா தி³ட்டோ² நிஸின்னோ மாதுகா³மஸ்ஸ மேது²னங் த⁴ம்மங் படிஸேவந்தோ’’தி, ஸோ ச தங் படிஜானாதி, ஆபத்தியா காரேதப்³போ³. ஸா சே ஏவங் வதெ³ய்ய – ‘‘அய்யோ மயா தி³ட்டோ² நிஸின்னோ மாதுகா³மஸ்ஸ மேது²னங் த⁴ம்மங் படிஸேவந்தோ’’தி, ஸோ சே ஏவங் வதெ³ய்ய – ‘‘ஸச்சாஹங் நிஸின்னோ, நோ ச கோ² மேது²னங் த⁴ம்மங் படிஸேவி’’ந்தி, நிஸஜ்ஜாய காரேதப்³போ³. ஸா சே ஏவங் வதெ³ய்ய – ‘‘அய்யோ மயா தி³ட்டோ² நிஸின்னோ மாதுகா³மஸ்ஸ மேது²னங் த⁴ம்மங் படிஸேவந்தோ’’தி, ஸோ சே ஏவங் வதெ³ய்ய – ‘‘நாஹங் நிஸின்னோ, அபிச கோ² நிபன்னோ’’தி, நிபஜ்ஜாய காரேதப்³போ³ . ஸா சே ஏவங் வதெ³ய்ய – ‘‘அய்யோ மயா தி³ட்டோ² நிஸின்னோ மாதுகா³மஸ்ஸ மேது²னங் த⁴ம்மங் படிஸேவந்தோ’’தி, ஸோ சே ஏவங் வதெ³ய்ய – ‘‘நாஹங் நிஸின்னோ அபிச கோ² டி²தோ’’தி, ந காரேதப்³போ³.

447. ஸா சே ஏவங் வதெ³ய்ய – ‘‘அய்யோ மயா தி³ட்டோ² நிபன்னோ மாதுகா³மஸ்ஸ மேது²னங் த⁴ம்மங் படிஸேவந்தோ’’தி, ஸோ ச தங் படிஜானாதி, ஆபத்தியா காரேதப்³போ³. ஸா சே ஏவங் வதெ³ய்ய – ‘‘அய்யோ மயா தி³ட்டோ² நிபன்னோ மாதுகா³மஸ்ஸ மேது²னங் த⁴ம்மங் படிஸேவந்தோ’’தி, ஸோ சே ஏவங் வதெ³ய்ய – ‘‘ஸச்சாஹங் நிபன்னோ, நோ ச கோ² மேது²னங் த⁴ம்மங் படிஸேவி’’ந்தி, நிபஜ்ஜாய காரேதப்³போ³. ஸா சே ஏவங் வதெ³ய்ய – ‘‘அய்யோ மயா தி³ட்டோ² நிபன்னோ மாதுகா³மஸ்ஸ மேது²னங் த⁴ம்மங் படிஸேவந்தோ’’தி, ஸோ சே ஏவங் வதெ³ய்ய – ‘‘நாஹங் நிபன்னோ, அபிச கோ² நிஸின்னோ’’தி, நிஸஜ்ஜாய காரேதப்³போ³. ஸா சே ஏவங் வதெ³ய்ய – ‘‘அய்யோ மயா தி³ட்டோ² நிபன்னோ மாதுகா³மஸ்ஸ மேது²னங் த⁴ம்மங் படிஸேவந்தோ’’தி , ஸோ சே ஏவங் வதெ³ய்ய – ‘‘நாஹங் நிபன்னோ அபிச கோ² டி²தோ’’தி, ந காரேதப்³போ³.

448. ஸா சே ஏவங் வதெ³ய்ய – ‘‘அய்யோ மயா தி³ட்டோ² நிஸின்னோ மாதுகா³மேன ஸத்³தி⁴ங் காயஸங்ஸக்³க³ங் ஸமாபஜ்ஜந்தோ’’தி, ஸோ ச தங் படிஜானாதி, ஆபத்தியா காரேதப்³போ³…பே॰… ஸச்சாஹங் நிஸின்னோ நோ ச கோ² காயஸங்ஸக்³க³ங் ஸமாபஜ்ஜிந்தி, நிஸஜ்ஜாய காரேதப்³போ³…பே॰… நாஹங் நிஸின்னோ அபிச கோ² நிபன்னோதி, நிபஜ்ஜாய காரேதப்³போ³…பே॰… நாஹங் நிஸின்னோ அபிச கோ² டி²தோதி, ந காரேதப்³போ³.

ஸா சே ஏவங் வதெ³ய்ய – ‘‘அய்யோ மயா தி³ட்டோ² நிபன்னோ மாதுகா³மேன ஸத்³தி⁴ங் காயஸங்ஸக்³க³ங் ஸமாபஜ்ஜந்தோ’’தி, ஸோ ச தங் படிஜானாதி, ஆபத்தியா காரேதப்³போ³…பே॰… ஸச்சாஹங் நிபன்னோ, நோ ச கோ² காயஸங்ஸக்³க³ங் ஸமாபஜ்ஜிந்தி, நிபஜ்ஜாய காரேதப்³போ³…பே॰… நாஹங் நிபன்னோ, அபிச கோ² நிஸின்னோதி, நிஸஜ்ஜாய காரேதப்³போ³…பே॰… நாஹங் நிபன்னோ, அபிச கோ² டி²தோதி, ந காரேதப்³போ³.

449. ஸா சே ஏவங் வதெ³ய்ய – ‘‘அய்யோ மயா தி³ட்டோ² மாதுகா³மேன ஸத்³தி⁴ங் ஏகோ ஏகாய ரஹோ படிச்ச²ன்னே ஆஸனே அலங்கம்மனியே நிஸின்னோ’’தி , ஸோ ச தங் படிஜானாதி, நிஸஜ்ஜாய காரேதப்³போ³…பே॰… நாஹங் நிஸின்னோ அபிச கோ² நிபன்னோதி, நிபஜ்ஜாய காரேதப்³போ³…பே॰… நாஹங் நிஸின்னோ, அபிச கோ² டி²தோதி, ந காரேதப்³போ³.

450. ஸா சே ஏவங் வதெ³ய்ய – ‘‘அய்யோ மயா தி³ட்டோ² மாதுகா³மேன ஸத்³தி⁴ங் ஏகோ ஏகாய ரஹோ படிச்ச²ன்னே ஆஸனே அலங்கம்மனியே நிபன்னோ’’தி, ஸோ ச தங் படிஜானாதி, நிபஜ்ஜாய காரேதப்³போ³…பே॰… நாஹங் நிபன்னோ, அபிச கோ² நிஸின்னோதி, நிஸஜ்ஜாய காரேதப்³போ³…பே॰… நாஹங் நிபன்னோ, அபிச கோ² டி²தோதி, ந காரேதப்³போ³.

அனியதோதி ந நியதோ, பாராஜிகங் வா ஸங்கா⁴தி³ஸேஸோ வா பாசித்தியங் வா.

451. க³மனங் படிஜானாதி, நிஸஜ்ஜங் படிஜானாதி, ஆபத்திங் படிஜானாதி, ஆபத்தியா காரேதப்³போ³. க³மனங் படிஜானாதி, நிஸஜ்ஜங் ந படிஜானாதி, ஆபத்திங் படிஜானாதி, ஆபத்தியா காரேதப்³போ³. க³மனங் படிஜானாதி, நிஸஜ்ஜங் படிஜானாதி, ஆபத்திங் ந படிஜானாதி, நிஸஜ்ஜாய காரேதப்³போ³. க³மனங் படிஜானாதி, நிஸஜ்ஜங் ந படிஜானாதி, ஆபத்திங் ந படிஜானாதி, ந காரேதப்³போ³.

க³மனங் ந படிஜானாதி, நிஸஜ்ஜங் படிஜானாதி, ஆபத்திங் படிஜானாதி, ஆபத்தியா

காரேதப்³போ³. க³மனங் ந படிஜானாதி, நிஸஜ்ஜங் ந படிஜானாதி, ஆபத்திங் படிஜானாதி, ஆபத்தியா காரேதப்³போ³. க³மனங் ந படிஜானாதி, நிஸஜ்ஜங் படிஜானாதி, ஆபத்திங் ந படிஜானாதி, நிஸஜ்ஜாய காரேதப்³போ³. க³மனங் ந படிஜானாதி, நிஸஜ்ஜங் ந படிஜானாதி, ஆபத்திங் ந படிஜானாதி, ந காரேதப்³போ³தி.

பட²மோ அனியதோ நிட்டி²தோ.

2. து³தியஅனியதஸிக்கா²பத³ங்

452. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா உதா³யீ – ‘‘ப⁴க³வதா படிக்கி²த்தங் மாதுகா³மேன ஸத்³தி⁴ங் ஏகோ ஏகாய ரஹோ படிச்ச²ன்னே ஆஸனே அலங்கம்மனியே நிஸஜ்ஜங் கப்பேது’’ந்தி தஸ்ஸாயேவ குமாரிகாய ஸத்³தி⁴ங் ஏகோ ஏகாய ரஹோ நிஸஜ்ஜங் கப்பேஸி காலயுத்தங் ஸமுல்லபந்தோ காலயுத்தங் த⁴ம்மங் ப⁴ணந்தோ. து³தியம்பி கோ² விஸாகா² மிகா³ரமாதா நிமந்திதா தங் குலங் அக³மாஸி. அத்³த³ஸா கோ² விஸாகா² மிகா³ரமாதா ஆயஸ்மந்தங் உதா³யிங் தஸ்ஸாயேவ குமாரிகாய ஸத்³தி⁴ங் ஏகங் ஏகாய ரஹோ நிஸின்னங். தி³ஸ்வான ஆயஸ்மந்தங் உதா³யிங் ஏதத³வோச – ‘‘இத³ங், ப⁴ந்தே, நச்ச²ன்னங் நப்பதிரூபங் யங் அய்யோ மாதுகா³மேன ஸத்³தி⁴ங் ஏகோ ஏகாய ரஹோ நிஸஜ்ஜங் கப்பேதி. கிஞ்சாபி, ப⁴ந்தே, அய்யோ அனத்தி²கோ தேன த⁴ம்மேன, அபிச து³ஸ்ஸத்³தா⁴பயா அப்பஸன்னா மனுஸ்ஸா’’தி. ஏவம்பி கோ² ஆயஸ்மா உதா³யீ விஸாகா²ய மிகா³ரமாதுயா வுச்சமானோ நாதி³யி. அத² கோ² விஸாகா² மிகா³ரமாதா நிக்க²மித்வா பி⁴க்கூ²னங் ஏதமத்த²ங் ஆரோசேஸி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஆயஸ்மா உதா³யீ மாதுகா³மேன ஸத்³தி⁴ங் ஏகோ ஏகாய ரஹோ நிஸஜ்ஜங் கப்பெஸ்ஸதீ’’தி! அத² கோ² தே பி⁴க்கூ² ஆயஸ்மந்தங் உதா³யிங் அனேகபரியாயேன விக³ரஹித்வா ப⁴க³வதோ ஏதமத்த²ங் ஆரோசேஸுங் …பே॰… ‘‘ஸச்சங் கிர த்வங், உதா³யி, மாதுகா³மேன ஸத்³தி⁴ங் ஏகோ ஏகாய ரஹோ நிஸஜ்ஜங் கப்பேஸீ’’தி? ‘‘ஸச்சங் ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம த்வங், மோக⁴புரிஸ, மாதுகா³மேன ஸத்³தி⁴ங் ஏகோ ஏகாய ரஹோ நிஸஜ்ஜங் கப்பெஸ்ஸஸி! நேதங், மோக⁴புரிஸ, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, இமங் ஸிக்கா²பத³ங் உத்³தி³ஸெய்யாத² –

453. ‘‘ந ஹேவ கோ² பன படிச்ச²ன்னங் ஆஸனங் ஹோதி நாலங் கம்மனியங், அலஞ்ச கோ² ஹோதி மாதுகா³மங் து³ட்டு²ல்லாஹி வாசாஹி ஓபா⁴ஸிதுங். யோ பன பி⁴க்கு² ததா²ரூபே ஆஸனே மாதுகா³மேன ஸத்³தி⁴ங் ஏகோ ஏகாய ரஹோ நிஸஜ்ஜங் கப்பெய்ய, தமேனங் ஸத்³தெ⁴ய்யவசஸா உபாஸிகா தி³ஸ்வா த்³வின்னங் த⁴ம்மானங் அஞ்ஞதரேன வதெ³ய்ய – ஸங்கா⁴தி³ஸேஸேன வா பாசித்தியேன வா. நிஸஜ்ஜங் பி⁴க்கு² படிஜானமானோ த்³வின்னங் த⁴ம்மானங் அஞ்ஞதரேன காரேதப்³போ³ – ஸங்கா⁴தி³ஸேஸேன வா பாசித்தியேன வா. யேன வா ஸா ஸத்³தெ⁴ய்யவசஸா உபாஸிகா வதெ³ய்ய தேன ஸோ பி⁴க்கு² காரேதப்³போ³. அயம்பி த⁴ம்மோ அனியதோ’’தி.

454. ந ஹேவ கோ² பன படிச்ச²ன்னங் ஆஸனங் ஹோதீதி அப்படிச்ச²ன்னங் ஹோதி குட்டேன வா கவாடேன வா கிலஞ்ஜேன வா ஸாணிபாகாரேன வா ருக்கே²ன வா த²ம்பே⁴ன வா கொத்த²ளியா வா யேன கேனசி அப்படிச்ச²ன்னங் ஹோதி.

நாலங் கம்மனியந்தி ந ஸக்கா ஹோதி மேது²னங் த⁴ம்மங் படிஸேவிதுங்.

அலஞ்ச கோ² ஹோதி மாதுகா³மங் து³ட்டு²ல்லாஹி வாசாஹி ஓபா⁴ஸிதுந்தி ஸக்கா ஹோதி மாதுகா³மங் து³ட்டு²ல்லாஹி வாசாஹி ஓபா⁴ஸிதுங்.

யோ பனாதி யோ யாதி³ஸோ…பே॰… பி⁴க்கூ²தி…பே॰… அயங் இமஸ்மிங் அத்தே² அதி⁴ப்பேதோ பி⁴க்கூ²தி.

ததா²ரூபே ஆஸனேதி ஏவரூபே ஆஸனே.

மாதுகா³மோ நாம மனுஸ்ஸித்தீ², ந யக்கீ² ந பேதீ ந திரச்சா²னக³தா, விஞ்ஞூ படிப³லா ஸுபா⁴ஸிதது³ப்³பா⁴ஸிதங் து³ட்டு²ல்லாது³ட்டு²ல்லங் ஆஜானிதுங்.

ஸத்³தி⁴ந்தி ஏகதோ.

ஏகோ ஏகாயாதி பி⁴க்கு² சேவ ஹோதி மாதுகா³மோ ச.

ரஹோ நாம சக்கு²ஸ்ஸ ரஹோ, ஸோதஸ்ஸ ரஹோ. சக்கு²ஸ்ஸ ரஹோ நாம ந ஸக்கா ஹோதி அக்கி²ங் வா நிக²ணீயமானே ப⁴முகங் வா உக்கி²பீயமானே ஸீஸங் வா உக்கி²பீயமானே பஸ்ஸிதுங். ஸோதஸ்ஸ ரஹோ நாம ந ஸக்கா ஹோதி பகதிகதா² ஸோதுங்.

நிஸஜ்ஜங் கப்பெய்யாதி மாதுகா³மே நிஸின்னே பி⁴க்கு² உபனிஸின்னோ வா ஹோதி உபனிபன்னோ வா. பி⁴க்கு² நிஸின்னே மாதுகா³மோ உபனிஸின்னோ வா ஹோதி உபனிபன்னோ வா. உபோ⁴ வா நிஸின்னா ஹொந்தி உபோ⁴ வா நிபன்னா.

ஸத்³தெ⁴ய்யவசஸா நாம ஆக³தப²லா அபி⁴ஸமேதாவினீ விஞ்ஞாதஸாஸனா.

உபாஸிகா நாம பு³த்³த⁴ங் ஸரணங் க³தா, த⁴ம்மங் ஸரணங் க³தா, ஸங்க⁴ங் ஸரணங் க³தா.

தி³ஸ்வாதி பஸ்ஸித்வா.

த்³வின்னங் த⁴ம்மானங் அஞ்ஞதரேன வதெ³ய்ய ஸங்கா⁴தி³ஸேஸேன வா பாசித்தியேன வா. நிஸஜ்ஜங் பி⁴க்கு² படிஜானமானோ த்³வின்னங் த⁴ம்மானங் அஞ்ஞதரேன காரேதப்³போ³ – ஸங்கா⁴தி³ஸேஸேன வா பாசித்தியேன வா. யேன வா ஸா ஸத்³தெ⁴ய்யவசஸா உபாஸிகா வதெ³ய்ய, தேன ஸோ பி⁴க்கு² காரேதப்³போ³.

455. ஸா சே ஏவங் வதெ³ய்ய – ‘‘அய்யோ மயா தி³ட்டோ² நிஸின்னோ மாதுகா³மேன ஸத்³தி⁴ங் காயஸங்ஸக்³க³ங் ஸமாபஜ்ஜந்தோ’’தி, ஸோ ச தங் படிஜானாதி, ஆபத்தியா காரேதப்³போ³. ஸா சே ஏவங் வதெ³ய்ய – ‘‘அய்யோ மயா தி³ட்டோ² நிஸின்னோ மாதுகா³மேன ஸத்³தி⁴ங் காயஸங்ஸக்³க³ங் ஸமாபஜ்ஜந்தோ’’தி, ஸோ சே ஏவங் வதெ³ய்ய – ‘‘ஸச்சாஹங் நிஸின்னோ, நோ ச கோ² காயஸங்ஸக்³க³ங் ஸமாபஜ்ஜி’’ந்தி, நிஸஜ்ஜாய காரேதப்³போ³…பே॰… நாஹங் நிஸின்னோ, அபிச கோ² நிபன்னோதி, நிபஜ்ஜாய காரேதப்³போ³…பே॰… நாஹங் நிஸின்னோ, அபிச கோ² டி²தோதி, ந காரேதப்³போ³.

ஸா சே ஏவங் வதெ³ய்ய – ‘‘அய்யோ மயா தி³ட்டோ² நிபன்னோ மாதுகா³மேன ஸத்³தி⁴ங் காயஸங்ஸக்³க³ங் ஸமாபஜ்ஜந்தோ’’தி, ஸோ ச தங் படிஜானாதி, ஆபத்தியா காரேதப்³போ³…பே॰… ஸச்சாஹங் நிபன்னோ, நோ ச கோ² காயஸங்ஸக்³க³ங் ஸமாபஜ்ஜிந்தி, நிபஜ்ஜாய காரேதப்³போ³…பே॰… நாஹங் நிபன்னோ, அபிச கோ² நிஸின்னோதி, நிஸஜ்ஜாய காரேதப்³போ³ …பே॰… நாஹங் நிபன்னோ, அபிச கோ² டி²தோதி, ந காரேதப்³போ³.

ஸா சே ஏவங் வதெ³ய்ய – ‘‘அய்யஸ்ஸ மயா ஸுதங் நிஸின்னஸ்ஸ மாதுகா³மங் து³ட்டு²ல்லாஹி வாசாஹி ஓபா⁴ஸந்தஸ்ஸா’’தி, ஸோ ச தங் படிஜானாதி, ஆபத்தியா காரேதப்³போ³. ஸா சே ஏவங் வதெ³ய்ய – ‘‘அய்யஸ்ஸ மயா ஸுதங் நிஸின்னஸ்ஸ மாதுகா³மங் து³ட்டு²ல்லாஹி வாசாஹி ஓபா⁴ஸந்தஸ்ஸா’’தி, ஸோ சே ஏவங் வதெ³ய்ய – ‘‘ஸச்சாஹங் நிஸின்னோ, நோ ச கோ² து³ட்டு²ல்லாஹி வாசாஹி ஓபா⁴ஸி’’ந்தி, நிஸஜ்ஜாய காரேதப்³போ³…பே॰… நாஹங் நிஸின்னோ, அபிச கோ² நிபன்னோதி, நிபஜ்ஜாய காரேதப்³போ³…பே॰… நாஹங் நிஸின்னோ, அபிச கோ² டி²தோதி, ந காரேதப்³போ³.

ஸா சே ஏவங் வதெ³ய்ய – ‘‘அய்யஸ்ஸ மயா ஸுதங் நிபன்னஸ்ஸ மாதுகா³மங் து³ட்டு²ல்லாஹி வாசாஹி ஓபா⁴ஸந்தஸ்ஸா’’தி, ஸோ ச தங் படிஜானாதி, ஆபத்தியா காரேதப்³போ³…பே॰… ஸச்சாஹங் நிபன்னோ நோ ச கோ² து³ட்டு²ல்லாஹி வாசாஹி ஓபா⁴ஸிந்தி, நிபஜ்ஜாய காரேதப்³போ³…பே॰… நாஹங் நிபன்னோ, அபிச கோ² நிஸின்னோதி, நிஸஜ்ஜாய காரேதப்³போ³…பே॰… நாஹங் நிபன்னோ, அபிச கோ² டி²தோதி, ந காரேதப்³போ³.

456. ஸா சே ஏவங் வதெ³ய்ய – ‘‘அய்யோ மயா தி³ட்டோ² மாதுகா³மேன ஸத்³தி⁴ங் ஏகோ ஏகாய ரஹோ நிஸின்னோ’’தி, ஸோ ச தங் படிஜானாதி, நிஸஜ்ஜாய காரேதப்³போ³…பே॰… நாஹங் நிஸின்னோ, அபிச கோ² நிபன்னோதி, நிபஜ்ஜாய காரேதப்³போ³…பே॰… நாஹங் நிஸின்னோ, அபிச கோ² டி²தோதி, ந காரேதப்³போ³.

ஸா சே ஏவங் வதெ³ய்ய – ‘‘அய்யோ மயா தி³ட்டோ² மாதுகா³மேன ஸத்³தி⁴ங் ஏகோ ஏகாய ரஹோ நிபன்னோ’’தி, ஸோ ச தங் படிஜானாதி, நிபஜ்ஜாய காரேதப்³போ³…பே॰… நாஹங் நிபன்னோ, அபிச கோ² நிஸின்னோதி, நிஸஜ்ஜாய காரேதப்³போ³…பே॰… நாஹங் நிபன்னோ, அபிச கோ² டி²தோதி, ந காரேதப்³போ³.

அயம்பீதி புரிமங் உபாதா³ய வுச்சதி.

அனியதோதி ந நியதோ, ஸங்கா⁴தி³ஸேஸோ வா பாசித்தியங் வா.

457. க³மனங் படிஜானாதி நிஸஜ்ஜங் படிஜானாதி ஆபத்திங் படிஜானாதி, ஆபத்தியா காரேதப்³போ³. க³மனங் படிஜானாதி நிஸஜ்ஜங் ந படிஜானாதி ஆபத்திங் படிஜானாதி, ஆபத்தியா காரேதப்³போ³. க³மனங் படிஜானாதி நிஸஜ்ஜங் படிஜானாதி ஆபத்திங் ந படிஜானாதி, நிஸஜ்ஜாய காரேதப்³போ³. க³மனங் படிஜானாதி நிஸஜ்ஜங் ந படிஜானாதி ஆபத்திங் ந படிஜானாதி, ந காரேதப்³போ³.

க³மனங் ந படிஜானாதி நிஸஜ்ஜங் படிஜானாதி ஆபத்திங் படிஜானாதி, ஆபத்தியா காரேதப்³போ³. க³மனங் ந படிஜானாதி நிஸஜ்ஜங் ந படிஜானாதி ஆபத்திங் படிஜானாதி, ஆபத்தியா காரேதப்³போ³. க³மனங் ந படிஜானாதி நிஸஜ்ஜங் படிஜானாதி ஆபத்திங் ந படிஜானாதி , நிஸஜ்ஜாய காரேதப்³போ³. க³மனங் ந படிஜானாதி நிஸஜ்ஜங் ந படிஜானாதி ஆபத்திங் ந படிஜானாதி, ந காரேதப்³போ³தி.

து³தியோ அனியதோ நிட்டி²தோ.

458. உத்³தி³ட்டா² கோ² ஆயஸ்மந்தோ த்³வே அனியதா த⁴ம்மா. தத்தா²யஸ்மந்தே புச்சா²மி – ‘‘கச்சித்த² பரிஸுத்³தா⁴’’? து³தியம்பி புச்சா²மி – ‘‘கச்சித்த² பரிஸுத்³தா⁴’’? ததியம்பி புச்சா²மி – ‘‘கச்சித்த² பரிஸுத்³தா⁴’’? பரிஸுத்³தெ⁴த்தா²யஸ்மந்தோ; தஸ்மா துண்ஹீ, ஏவமேதங் தா⁴ரயாமீதி.

தஸ்ஸுத்³தா³னங் –

அலங் கம்மனியஞ்சேவ, ததே²வ ச நஹேவ கோ²;

அனியதா ஸுபஞ்ஞத்தா, பு³த்³த⁴ஸெட்டே²ன தாதி³னாதி.

அனியதகண்ட³ங் நிட்டி²தங்.